Ngororero: Hari abagore bitwaza ihame ry'uburinganire bagahohotera abagabo

Mu murenge wa Matyazo mu karere  ka  Ngororero , hari  abaturage  bavuga  ko  hari  abagabo  bahohoterwa  bagakubitwa  n’abagore  babo, bajya no kubarega  bikarangira  ari  bo bafunzwe.

Abaganiriye na Tv1 bavuze ko iki kibazo kimaze gufata  indi ntera, kuko  ngo  abagore  bitwaza ihame ry’uburinganire , bakabakubita. Bati’’ Abagore basigaye bitwaza uburinganire ngo bahawe ijambo bakaduhohotera bikanarangira bigiriye ahandi bataye ingo zabo, hari n’ubwo badufungisha ,iyo bagiye kurega muri RIB bakavuga ko tubahoza ku nkeke,  umugabo witabye wese ntahava ahita afungwa”.

Kubera  guhohoterwa cyane, aba bagabo  bavuga  ko  bifuza  ko habaho  imiryango  myinshi  irengera uburenganzira  bw’abagabo  nk’uko hariho  irengera  ubw’abagore. Baragira Bati:”Natwe dusigaye duhohoterwa twavuga ntitwitabweho, buriya Havutse imiryango irengera abagabo hashyirwaho amategeko aturengera kuko ariho yose usanga ahengamiye ku bagore , ni nayo mpamvu basigaye babyitwaza tugasigara nta ruvugiro dufite”.

Ku ruhande  rw’ubuyobozi bw’akarere  ka  Ngororero  Mukunduhirwe Benjamine umuyobozi  wungirije  ushinzwe imibereho myiza, avuga  ko ihamwe  ry’uburinganire  ryaje rije guha amahirwe  angana  abagore  n’abagabo, itaje gutuma  abagore  bigaranzura  abagabo.

Ati’’ Bagore  bagenzi  banjye bo mu karere ka Ngororero mureke  iri hame  ritubere  iryo kubyaza amahirwe, ntiritubere iryo gusenya ingo , gahunda  yo  kubahana  nk’abubatse ingo  tuyikomeze, gahunda yo gucunga umutungo tuyikore neza  bizakemuka’’.

Uyu muyobozi  kandi  avuga  ko muri aka karere  hose  hagenda  hakorwa  ibiganiro bigamije  gufasha abagore  n’abagabo kumva  no gusobanukirwa  neza  ihame  ry’uburinganire, kugira  ngo  hatagira abaryumva  nabi  bakarikoresha  nabi.

Marie  Jeanne UWAMBAYINEMA/heza.rw