Kamonyi: Abakorerabushake bita ku bana bafite ubumuga barasaba agahimbazamusyi

Bamwe  mu bakorerabushake  bita ku bana  bafite  ubumuga  bagororerwa  mu kigo  cya CEFAPEK giherereye  mu murenge wa Gacurabwenge , mu karere  ka  Kamonyi , barasaba  ubuyobozi  ko  bwagira  akantu  bujya  bubagenera nk'agahimbazamusyi , kuko uyu  murimo bakora  ari  ubwitange  nta  gihembo  bagenerwa  kandi  bakaba  nabo  bagomba  kwiteza  imbere.

Karucurira Priscille umwe  muri aba babyeyi  utuye mu murenge wa Gacurabwenge,  avuga  ko bitanga  bakajya  kugorora umwana  ariko  ngo  ntacyo  babona , bifuza  ko  bagiye  akantu bahabwa  byabongerera  imbaraga  zo  gukora  uyu murimo neza. Agira ati''ubu ejo hari abari bari hano  bagorora abana , n'uyu munsi turahari n'ejo  hari abazaza turitanga  tugakora  tugize  agahimbazamushyi  tubona  kadufasha tukajya  tubagorora  natwe  twariye  dufite  imbara  n'umubiri  umeze  neza  kuko iyo twaje  nta  kintu  tuba  twakoze, habe guhinga ''.

ibi abihuriyeho  na  Nyirandimubanzi  Esperance  nawe  ukora  uyu  murimo  wo kugorora abana, umurimo  yakoze  nyuma y'uko  azanye  umwana  we akavurwa agakira  akumva agomba no  gufasha abandi bana maze  atangira  guhugurwa  aba  umukorerabushake. Ati''Icyifuzo  dufite  ni ubushake  nyine  urumva  ni ubwitange  ariko  turi  abantu  turi  mu isi tugira  ibintu  dukenera, urumva  niba uje gatatu  mu cyumweru  nta muhinzi  usize  mu rugo  ntiwahinze  urumva  biragoye dushaka  akantu  kadufasha  natwe tukabona  ikitubeshaho''. 

Sr Mukarubayiza  Donatille umuyobozi  wa CEFAPEK  avuga  ko  abakorerabushake  bitanga  nta faranga  na  rimwe  bahabwa, dore  ko harimo n'abakorera  ku bigo nderabuzima  harimo n'icya Nyamiyaga . Agira ati'' Bariya  bantu  baritanga  mwabonye ibyo  bakora ,   mu ngengo  y'imari  bakora  bagakwiye  kugira  akantu kabafasha, icyakora   bibumbira  mu makoperative akarere kagira icyo gafasha ayo makoperative  yabo ariko babonye  n'ubundi bufasha  urugo rugira  byinshi byaba  ari byiza kandi byabafasha.''

Sr Mukarubayiza  kandi  avuga ko muri  aba bakorerabushake  harimo  ababyeyi  bagiye  bafata abana  batari  ababo  bakabarera.Ati''ikindi  navuga  kuri  aba  bakoranabushake  nuko igihe bavugaga  ngo  ibigo by'imfubyi biveho abana  bafite  ubumuga  babuze  aho  bajya,  ubu aba  babyeyi mubona  hano  b'abakorerabushake  abana bafite  si  ababo. Ni abo  bagiye  bafata  bakabarera''.

ku ruhande  rw'ubuyobozi  bw'akarere  ka  Kamonyi , Uwiringira  Mari  Josée   umuyobozi  wungirije  ushinzwe imibereho myiza avuga  ko  ikigo  CEFAPEK kibafasha  kumenya  no  kwita  ku bafite ubumuga. Aba  babyeyi  basaba  agahimbazamusyi  ngo ntako  babona  gafatika  ariko   ntibakora  buri  munsi  kuko babikora  mu matsinda  ndetse umuntu akanakorera  mu itsinda rimwegereye, ariko  ngo banabashakira ibindi  bikorwa  bibahuza  ndetse  banahabwa amahugurwa atandukanye. Agira ati '' Abana bagorora  ni  ababo baba babikorera  dufatanyije  n'uriya mufatanyabikorwa  bafite  amatsinda  bagahanahana  amafaranga, bafite imilima  bahinga bahuriramo  kandi  bishimira  ko bafasha  abana  bakabagorora .''  

Mu karere  ka Kamonyi  habarurwa abafite ubumuga  4 273. harimo abana  744. Kuri  ubu abakorerabushake  bakora uyu murimo  wo  kugorora  abana  ari 80  bakorera  kuri  site 18, kuri  ubu harimo  guhugurwa  abandi  30 hakazahita  hatangizwa  indi  site ya 19 igihe  aba  batangiye  uyu murimo.Uretse  ubufasha  bw'ibiryo  bahawe n'abanyeshuri  ba Green Hills uyu  muyobozi  avuga ko  n'ingengo  y'imari  ya miliyoni eshatu  bakoresha  idahagije, kuko uyu murimo  wo kugorora  abana  usaba  ibikoresho  bitandukanye  kandi  byose  bikaba  bihenze.

Abakorerabushake  barimo kugorora abana  bafite ubumuga, nuwo ari ubwitange  ariko basaba ko bagira akantu bagenerwa.

Uwambayinema  Marie  Jeanne /heza.rw