Kuba Biguma yahamijwe ibyaha biratanga icyizere ko n’abandi bakihishe bazafatwa bakaburanishwa: Ibuka mu karere ka Nyanza

Kuri uyu wa kabiri tariki ya 17 ukuboza 2024 , urukiko rwa  rubanda  ruri I Paris mu Bufaransa rwakatiye igifungo cya  burundu  Hategekimana Philippe Manier uzwi ku izina  rya Biguma, ndetse  runamuhamya ibyaha bya Jenoside  n’ibyibasiye inyoko muntu.

Abarokotse Jenoside yakorewe Abatutsi mu karere ka Nyanza bakomeje kuvuga  ko bafitiye icyizere ubutabera bw’u Bufaransa .

Niyitegeka Jean Baptiste perezida wa Ibuka mu karere ka Nyanza yatangaje  ko  nk’abahagarariye inyungu z’abarokotse Jenoside bishimiye igihano cya burundu cyahawe  Biguma , kuko bitanga icyizere ko n’abandi bakihishe hirya no hino  mu Bufaransa  cyangwa mu Bihugu  by’abaturanyi bazafatwa nabo bakaburanishwa.

Yagize ati’’Ni umwanzuro twari twiteze kubona  byadushimishije kuba  yahamijwe ibyaha bya Jenoside  ndetse  akanahabwa igihano  kiruta ibindi cyo  gufungwa burundu.’’

Yakomeje agira ati’’ Mbera na mbere twabanza gushimira Igihugu cy’u Bufaransa na Leta yacu y’ubumwe kuko byose biri kuva mu mubano mwiza ugenda wubakwa. Kuba yabihamijwe ubwabyo biravanaho intimba yari imaze imyaka 30 kandi biratanga n’icyizere ko n’abandi bakihisheyo  bazagera aho bagafatwa bakaburanishwa’’.

Niyitegeka kandi avuga ko bababajwe  no kumva  ko Biguma  nk’uwari umujandarume afatanyije n’interahamwe, ataburanishirijwe ibyaha byakorewe ku gasozi ka Karama, kandi ko batunguwe na byo bakifuza  ko haramutse  hari iyindi nzira  yo kuburanishwa nabyo yabiburanishwa.

Hategekimana Philippe yari yarakatiwe iki gihano cya burundu ku wa 26 Kamena 2023, maze aza kujuririra uyu mwanzuro w’urukiko. Ku itariki ya 4 ugushyingo 2024 nibwo urubanza rw’ubujurire bwe bwatangiye kuburanishwa.

Uyu mugabo w’imyaka 67 wahoze ari umujandarume avuka ahahoze ari komini Rukondo muri Gikongoro, kuri ubu ni mu karere ka Nyanza.

Yhamijwe ibyaha byaha byo kwica Abatutsi bari bahungiye ku musozi wa Nyamure,Nyabubare , Isar Songa, n’ahandi.

Biguma  kandi yahamijwe icyaha cyo kwica uwari Burugumesitiri wa Komini Ntyaza Nyagasaza Narcisse , kuyobora  ibitero no gushyiraho zabariyeri ahantu hatandukanye mu karere ka Nyanza.

UWAMBAYINEMA Marie Jeanne