Muhanga : Barifuza ko ibisambo byafatirwa ingamba zikakaye

Nyuma  y’uko  mu rukerera  rwo  kuri  uyu  wa gatandatu itariki  8 werurwe  2023  mu mudugudu  wa Rutenga, akagari  ka  Gahogo umurenge  wa  Nyamabuye,  harasiwe  igisambo kivuye  kwiba, bamwe  mu  batuye  mu mujyi  wa  Muhanga  bavuga  ko  bishimiye  iki  gikorwa  maze  basaba  ubuyobozi  ko  n’ibindi  bisambo  bisigaye  byafatirwa  ingamba  zikakaye,  kugira ngo  barusheho  kugira  umutekano .

Ndagijimana Jean  Bosco  utuye  mu mudugudu  wa Rugarama  akagari  ka  Gifumba, avuga  ko  bashimiye  abashinzwe  umutekano  ko  babahaniye  kimwe  mu bisambo  byabazengereje, maze  akifuza  ko  bikomeza. Ati’’ Bari  bamaze  kutuzengereza  nta  muntu  wari ukigenda  mu muhanda  wenyine  cyangwa  ngo  agende  afite  agatelefoni, iyaba  ahubwo  polisi  yari idufashije  ikarasamo  nka  20  wenda  twahumeka kabiri  kuko  rwose  abajura  baratuzengereje’’.

Ndayambaje  Twamugize  utuye  mu mudugudu  wa  Rutenga, avuga  ko  Atari  ubwa  mbere  muri  aka  gace  bahiba  kuko  ngo  barahayogoje . Ati’’ Nubu ejo bundi  hari umukobwa  ucuruza  mituyu  baherutse  kumushikuza  agakapu  karimo  amafaranga, atatse uje  gutabara  bamutema  mu mutwe  birakabije’’.

Aba  baturage  bavuga  ko  babazwa  no  kumva  ko  ibisambo  byafashwe  byajyanwe  mu bigo  by’inzererezi  bakongera  bagataha . Ati’’ Abiba  ni  abirirwa  bakatakata hano  mu mujyi , ku manywa  iyo  twagiye  mu kazi  baba  bakora  na nijoro baba  bakora. Urebye  iyo  bamufashe  akajyanwa  mu  nzererezi  bagasanga  atujuje  imyaka  18 baramurekura byaba  byiza  banashyizeho  ibihano by’abana bato  biba  kuko abnshi  tuba  tubazi’’,

Umunyamabanga  nshingwabikorwa  w’umurenge  wa Nyamabuye  Nshimiyimana  Jean  Claude, avuga  ko umujura  warasiwe  muri  uyu mujyi  wa Muhanga, Polisi  yamurashe  mu rukerera  rwo kuri  uyu wa 8. Yahuye  n’abapolisi  bari  mu kazi kabo  ko guca umutekano  bamuhagaritse  yanga  guhagarara  ariruka, bagerageje  kurasa  amasasu  atatu  mu kirere  ngo  ahagarare  aranga niko kumurasa irya  kane  ahita  apfa.

Uyu muyobozi  avuga  ko  ibi  bikwiye  kuba  isomo  ku  baturage ko  inzego z’umutekano n’ubuyobozi  ziri  maso  kugira  ngo  bacunge  umutekano wabo. Ati’’ ariko kandi  bikaba  bigomba  gutanga  n’ubundi butumwa  ku bari  mu bikorwa  by’ubujura  cyangwa  guhungubanya umutekano  w’abaturage, ntabwo  bazihanganirwa turabasaba  kubireka  bakaba  abaturage  nk’abandi, bakayoboka  imirimo  ituma  bibeshaho  ariko  ibikorwa  nk’ibi ngibi  bakabihagarika’’.

Muri operasiyo  iherutse  gukorwa  mu karere  ka  Muhanga abantu  340  bafatiwe  mu bikorwa  bibi birimo  n’ubujura  ubu  bakaba  bacumbikiwe  mu kigo  cyakira  abagaragaweho  ibi bikorwa Transit  center.

Marie  Jeanne  UWAMBAYINEMA