Gisagara-Kansi : Barasaba guhabwa imodoka zitwara abagenzi

Bamwe  mu   batuye  mu Murenge  wa  Kansi  mu Karere  ka  Gisagara, bavuga  ko bafite imihanda  myiza  ikoze neza  ariko  bakaba  badafite  imodoka  zitwara  abagenzi, kugera  mu karere  ka  Huye  bisaba  gutega  moto  cyangwa  amagare.

Uku  kutagira  imodoka  zitwara abagenzi  ni  bimwe  mu  bibahombya  kuko bisaba  gutegesha  amafaranga  menshi,  kubura  isoko  ry’umusaruro  wabo  kuko  bisaba  ko abacuruzi  babasanga  aho batuye , bityo  bakabahera  igiciro  gito  ndetse  ngo  hari n’abahitamo  kubitegera  amagare bakabigeza  mu karere ka Huye  aho  bafite  isoko rinini  ry’umusaruro  wabo.

Mbarubukeye  Evariste utuye mu Mudugudu wa Ruhuha mu Kagari k’Akaboti muri  uyu Murenge avuga  ko  bavunika  cyane  kuko  kugera  I Huye  bisaba  gutega  moto ,bategesha  amafaranga  angana ni 1500 Frw kugenda  gusa.

Ati’’ Imihanda  irahari ikoze  neza  mu Tugari  twose  ariko nta  modoka  zitwara abagenzi  zihaba , imyaka  yacu iyo yeze  tuyijyana  mu isoko  rya  hano rya Mburamazi , twaba dufite imyaka irenze tugategereza  abashoramari  bazaza kuyigurira  hano iwacu. Twifuza ko natwe  twabona  imodoka  ukeneye  kugenda bikamworohera’’.

Mukamugabe  Marie Immaculée nawe utuye  muri uyu Murenge, avuga  ko kuva  yabaho  atigeze  abona  imodoka  zitwara abagenzi zigera  mu murenge wabo, ndetse  ngo  yanagerageje  no kubaza  abakuze asanga  kuva na kera  ntazigeze zihagera.

Ushaka  gutega  imodoka  ngo bimusaba  gutega  akajya ahitwa  i Kibirizi gutega izavuye i Mugombwa.

Ati’’ mu myaka  mfite nta modoka  itwara  abagenzi mu buryo bwa rusange  nigeze  mbona , uretse  imodoka 3 z’abantu  biguriye  ku giti  cyabo ni twa  tuvatiri  dutoya  two  gutemberamo.@

Avuga ko  kugera i Huye bisaba gutega moto cyangwa  gutega  igare, ku igare bisaba kugenda uvaho kubera imisozi. 

Nshutiraguma  Revelien ni umusaza  ukuze  ndetse  wanahavukiye  avuga  ko  bibagora  kuko  kujya I huye  bisaba ko bagenda  n’amaguru  bakagera  mu iRango , mu kugaruka  bagatega  igare  uwishoboye  agafata  moto.

Ati’’ Kera  mbere ya Jenoside  hajyaga  haza  bisi nini ya ONATRACOM nyuma ya jenoside  rero  ntabwo  yongeye  kugaruka, imodoka  ziza  mu gihe  cy’abanyeshuri  ni zimwe  ziza  kubafata  ku  bigo bagiye mu biruhuko zikazabagarura baje gutangira  naho  ubundi i Kansi nta zo tugira pe’’.

Ku ruhande  rw’Umuyobozi  w’Umurenge wa Kansi,  Kimonyo  Innocent  avuga  ko  imihanda  ya Kansi  yose  ikoze  ariko  kwambuka  ujya  mu karere  ka  Huye usanga  bigoye  kuko imihanda yo mu karere  ka  Huye  itameze neza.

Gitifu Kimonyo avuga ko kuva mu I Rango ujya mu Murenge wa Kansi imodoka zitwara abagenzi zanga kujyayo.

Ati’’ Imodoka zo  ntazihari  kubera  imihanda  kuko tumaze iminshi  tuganira n’abazifite  ariko bakavuga  ko imihanda  idakoze  neza  mu gice  cya  Huye, ubwo  rero tumaze iminsi  tuganira  n’Umurenge wa  Mukura, hari umuhanda baherutsegukora urimo kaburimbo ngo barebe ko bawigiza  hepfo, izo mbogamizi  rero niziramuka  zivuyeho  imodokazizaza  kuko  iyo uyijyanye ikangirika biragorana  kuyikoresha abatunze imodoka  bo barabizi.’’

Uku  kutagira  imodoka  zitwara abantu  mu buryo  bwa  rusange  kandi  butuma  hari  abahinzi  bemera  bagahendwa  n’abaguzi, batanga urugero  ko ikilo cy’ibigori mu Murenge  wa Kansi  ari amafaranga 280 mu  gihe  iRango mu karere  ka Huye  ari 310.

Marie Jeanne  UWAMBAYINNEMA/heza.rw

Abatuye mu murenge wa Kansi mu karere ka Gisagara , bavuga  ko bafite ikibazo cyo kutagira imodoka zitwara abantu mu buryo bwa rusange kandi bafite imihanda myiza.