Nyamasheke : Minisitiri Bayisenge yakanguriye abaturage kwirinda guhishira abahohotera abangavu

Minisitiri w’uburinganire n’iterambere  ry’umuryango  Prof  Bayisenge  Jeannette, yavuze ko kuri ubu imibare  y’abana  basambanywa bagaterwa  inda  ikomeje kuzamuka , aho  buri mwaka  haboneka  abasaga ibihumbi 20 batewe inda  bakabyara, kandi  nabo  bakiri  abana, maze  asaba  ababyeyi  n’abana kudakomeza guhishira  ababikora,  kuko  ari  abagizi  ba nabi, bakaba  ba bihemu barimo kwangiza  abana  b’Igihugu.

Ibi yabigarutseho  ubwo  hatangizwaga  ubukangurambaga  bw’iminsi 16 yo kurwanya  ihohoterwa,  umunsi  watangirijwe mu karere  ka Nyamasheke, ku rwego  rw’Igihugu.

Minisitiri  Bayisenge yavuze  ko uyu muco  mubi  wo  guhishira  abatera inda aba bana b’abakobwa , bituma  batamenyekana ngo bahanwe.

Ati’’ Yaba  ababyeyi , yaba  abana batewe inda,  mwese ndabasaba  kugaragaza  aba bantu  kugira ngo  bahanwe. Iyo badahanwe bakomeza kugenda  bahohotera  n’abandi,  n’uwabonye  bataramugaragaje ngo  abihanirwe  nawe akabikora , kuko azi ko nta cyo bitwaye. Hari  ababyeyi  b’abana usanga  babafata nk’abakwe  babo ntibabavuge kubera  amafaranga yamwemereye,  cyangwa ubucuti  bw’imiryango, ndabasaba ko twese  twafatanya  tukarandura iki  kintu’’.

Umuyobozi  w’akarere ka Nyamasheke  Mukamasabo Appolonie asaba ababyeyi  kurera no  guha  abana  uburere  bwiza, kandi  abagize ibyago  bagaterwa  ngo  ntibakwiye gutereranwa  n’imiryango  ahubwo  bakwiye kumva ko nabo bakiri abana.

Nyiranshuti  Gerturde utuye mu murenge wa Kanjongo, umwe mu babyeyi  bafite abana  babiri  bahohotewe  bagaterwa inda, avuga  ko  ari ikintu cyamuhungabanyije  we n’umugabo  we ,kubona  abana babiri  bose baterwa inda bakabyara.

Ati’’ Dufite abana barindwi bagiye biga bose bacikishiriza amashuri, tugize amahirwe umwe arakomeza aratsinda  ageze mu mwaka wa kane, tubura amafaranga y’ishuri arivamo baba bamuteye inda, umwana aratorongera turamubura, icyakora nyuma turamushaka tumugarura mu rugo. Amaze kubyara murumuna we nawe wigaga mu mashuri abanza twumva nawe ngo aratwite  noneho birushaho kuduhungabanya, twummva tubuze icyo dukora. ‘’

Migeprof  kandi  itangaza  ko mu myaka itatu ishize  byagaragaye ko umubare  w’abahohotewe bagana  ahatangirwa  serivisi  zihabwa  abahohotewe, wiyongereye. Nubwo  ngo  n’abagabo  bahohoterwa  ariko kugeza ubu  90% by’abahohoterwa  bigaragara ko ari abagore n’abana cyane cyane abakobwa.

Muri iyi minsi 16 y’ubukangurambaga  yo kurwanya  ihohoterwa , hateganyijwemo gahunda  nyinshi  harimo no guha serivisi  abahohotewe. Insanganyamatsiko  y’uyu mwaka igira iti’’ Dufatanye twubake umuryango uzira ihohotera’’.

Marie Jeanne UWAMBAYINEMA/heza.rw