U Bufaransa bwajyanye mu nkiko abana batanu ba Omar Bongo
HEZA
Ibirego byatanzwe muri Kamena na Nyakanga mu iperereza rimaze imyaka 15, ku barimo Pascaline Bongo w’imyaka 66, umukobwa we mukuru ndetse yabaye umuyobozi w’ibiro bye na Omar Denis Jr Bongo w’imyaka 28, akaba n’umwuzukuru wa Perezida wa Congo, Denis Sassou Nguesso.
Abandi ni Jeanne Matoua w’imyaka 38 na Joseph Matoua w’imyaka 40, nk’uko amakuru yavuye mu rukiko yabyemeje kuri uyu wa Gatanu, byemezwa n’ikinyamakuru Africa Intelligence. Ntabwo umwana wa gatanu yahise atangazwa.
Bashinjwa kwakira imitungo ya leta yatanzwe mu buryo butemewe, "kugira uruhare muri ruswa", iyezandonke no gukoresha nabi umutungo rusange.
Omar Bongo yayoboye Gabon kuva mu 1967 kugeza ubwo yapfaga mu 2009, asimburwa n’umuhungu we Ali Bongo Ondimba.
Yari afite abana 54, ndetse benshi muri bo bashobora gukomeza kugenda bagezwa mu nkiko, baregwa ibyaha by’iyezandonke na ruzwa.
Abagenzacyaha bo mu Bufaransa bavuga ko benshi mu bagize uyu muryango bagize uruhare mu kwigwizaho imitungo yaje kugera muri miliyoni 85 z’amayero.
Umwunganizi wa Omar Denis Jr Bongo, Jean-Marie Viala, yamaganye ibiregwa umukiliya we.
Hagati ya tariki 25 Werurwe na 5 Mata, Abagenzacyaha b’u Bufaransa batanze ibirego ku bandi bana bane ba Bongo: Grace, Betty, Arthur na Hermine Bongo.
Baregwa ibyaha birimo guhishira inyerezwa ry’umutungo wa Leta, ruswa, no gukoresha nabi umutungo wa Leta nk’uko inyandiko zabonywe na AFP zibigaragaza.
