Musanze : Umubyeyi utwite agiye kubyara aba mu gisa nk’ikiraro

Mutuyimana Speransiya  uwasigajwe  inyuma  n’amateka  utuye  mu kagari ka Kabazungu  mu murenge wa Musanze, mu karere  ka Musanze, kuri  ubu  aratwite  ndetse ari no hafi kubyara, ahangayikishijwe  no kuba  agiye  kubyara  umwana  aba mu nzu  iva ndetse itanahomye .

Iyo  uganiriye  n’uyu mubyeyi  akubwira ubuzima abayemo burimo  kuba  aba mu nzu ikikijwe n’ibihuru  by’ibyatsi kuko ngo  aribyo bibarinda  imbeho.

 Ati’’ Mbayeho  nabi cyane cyane, wagira ngo  ni igihangari  cyangwa inzu  y’abashumba. Bacyubatse  nabi tuyibamo  turi abantu 6 hamwe  n’umugabo  wanjye. Iyo  imvura iguye umuyaga ukaza ngira  ubwoba cyane ngo  noneho kiratugwiriye’’.

Kuba iyi nzu  ikikijwe  n’ibyatsi  byahameze bakaba batabikuraho, uyu mubyeyi  avuga ko  aribyo  bibakingiriza  imbeho igihe baryamye bigatuma itinjira mu nzu.

Mukera  umugabo  wa Mutuyimana avuga  ko  nubwo  aho baba  hitwa  ko  ari mu nzu  ariko ngo hameze  nk’ikiraro cy’inka. Iyo  imvura  iguye  barara  bahagaze  cyangwa  bakemera bakanyagirwa.

Ati’’Ni ikibazo kizwi  na  ba mudugudu  na ba gitifu  b’umurenge  barakizi. Iyo  tubibabwiye  baratubwira  ngo  bazaza  kudukorera  umuganda batwubakire neza  tugategereza  tugaheba’’.

Akomeza agira Ati’’Icyo  twifuza ni uko badukura  muri  iyi nzu  turimo natwe  bakadushyira  mu buzima bwiza tukabaho neza nk’abandi. Naho ba mudugudu  baradupfukiranye bakaturyamirire  bavuga ngo baraza gukora umuganda bikarangira bataje’’.

Ku ruhande rw’ubuyobozi  bw’akarere ka Musanze  Ramuri  Janvier  umuyobozi  wako, yabwiye  mama u rwagasabo  ko ikibazo  cy’abadafite  aho kuba, Atari umwihariko w’abasigajwe inyuma  n’amateka  gusa, ahubwo  ngo hari  n’imindi miryango  idafite  aho kuba barimo gushakira aho kuba.

Ati’’ Ntabwo  ari umwihariko w’abasigajwe inyuma  n’amateka gusa, ahubwo  mu kagari ka Kabazungu  ni ahantu turimo kwitaho  cyane  dufatanyije  na polisi ngo abaturage babone  aho kuba  ahubwo twahereye ku babaye  kurusha  abandi’’.

Usibye kuba uyu muryango  udafite inzu  yo  kubamo, unavuga ko wifuza  ko Perezida  wa Repubulika Paul Kagame yabafasha  nabo  bagahabwa itungo  ryo korora nk’uko abandi bayafite, kuko ngo  bashobora kuyitaho bakayahirira.

Mutuyimana Speransiya n'umuryango we baba mu nzu isa nk'ikiraro.  Photo/mama u rwagasabo 

Ibyatsi byameze ku nzu yabo ngo nibyo bibarinda imbeho ya nijoro. Photo/mama urwagasabo