Burera : Abakoze muri VUP barataka inzara baterwa no kuba bamaze igihe badahembwa

Bamwe mu bageze  mu  zabukuru   n’abatishoboye  bo  mu murenge wa Kagogo  mu karere  ka  Burera mu ntara y’amajyaruguru bahawe  akazi  ko gukora  imirimo  y’amaboko muri  VUP barataka  inzara, baterwa  no kuba  bamaze  amezi  asaga  abiri badahembwa  amafaranga  bakoreye.

Sekabuga  Innocent w’imyaka 65 ni umwe  mu  bageze  mu zabukuru  bahawe  akazi  ko gukora  imirimo  y’amaboko  ya VUP , wo mu murenge  wa Kagogo  mu karere ka Burera, uyu musaza ndetse na bagenzi be bvuga ko  bagiye kwicwa  n’inzara  kuko bamaze  amezi ane badahembwa.

Agira ati'' Imibereho yo  ntayo tubayeho nabi, bamfitiye ibihumbi 210 bahora batubeshya batubwira ngo ari ku karere, azaza tugategereza tugaheba''.

Mukandengo nawe ukora muri VUP avuga  ko  afite impungenge  ko  hagize  urwara mu muryango we atabona  uko amuvuza , kuko atigeze  atanga ubwishingizi  bwo kwivuza  bwa mituweli dore ko yari  ategereje  kuzabwishyura mu mafaranga azahembwa.

Ati'' Ubu bamfitiye ibihumbi 210 , imbogamizi  ya mbere mfite n'uko ntishyuye mituweli kubaho  byo  ni Uwiteka kuko ntiwavuga  ngo  turarya ,warya iki se udahembwa  kandi  tuzinduka tuza mu kazi.

Ku ruhande  rw'umunyamabanga nshingwabikorwa  w'umurenge  wa  Kagogo, Mwambutsa Amani Wilson umunyamabanga nshingwabikorwa  w'uyu murenge avuga  ko  iki kibazo  cy'aba  baturage  bakizi, kandi ko barimo gukora ibishoboka ngo gikemuke.

Agira ati'' Mu gihe  cyo  gusoza umwaka  w'ingengo  y'imari twagize ikibazo  sisitemi ivaho, ariko twari twandikiye  akarere tugasaba  amafaranga, n'ubu rero ntibirakemuka. Ariko turimo kubikurikirana bizakemuka vuba''.

Gahunda  ya VUP yatangiye mu mwaka wa 2008 igamije  kuzamura  abatishoboye  bari mu bukene.Ubusanzwe  bahemberwa  iminsi 10 cyangwa 15, aba  bo  bakavuga  ko  bamaze  amezi atatu badahembwa.