Muhanga: Abagore barakangurirwa kubyaza umusaruro ubucukuzi bw'amabuye y'agaciro buhari

Mu karere  ka  Muhanga  ni hamwe  mu hakorerwa  ubucukuzi bw'amabuye  y'agaciro, ubu  bucukuzi  bukaba  buzwiho  gutanga  akazi  kandi uwakagezemo akabona amafaranga. Aha  ni naho  abagize  inama y'igihugu  y'abagore CNF mu karere  ka  Muhanga, bahera  basaba  abagore  bahagarariye, kubyaza  umusaruro ubu bukungu  buboneka mu karere  kabo maze  nabo  bagakora ku ifaranga.

Mukasekuru  Marcelline  umuhuzabikorwa  w'inama y'Igihugu  muri aka karere, avuga  ko mu mihigo  bagira  nka  ba Mutima  w'urugo harimo  gukangurira  abagore guhaguruka bagakora, bakagira  amafaranga  kuko usanga  iyo umugore ntacyo yinjiza  mu rugo  bibyara amakimbirane.

Agira ati'' Tugiye gushishikariza  umuryango  wose  uburyo bwo gukora ku ifaranga,  ariko cyane cyane  umugore , kuko murabizi mu bibazo birimo kuvuka cyane cyane  ibitera  amakimbirane , harimo n'ibibazo  by'umutungo, ngo  abasangiye  ubusa  bitana ibisambo''. 

Mukasekuru  kandi akomeza  avuga ko bashaka  gushishikariza abagore  birenzeho kujya mu bimina , bakinjira mu makoperative. Ati''Ariko na  none  nk'akarere kacu ka  Muhanga  gafite ubucukuzi bw'amabuye y'agaciro, turashaka  gushishikariza  abagore bajyeyo , bajye  gufata  kuri ayo  mafaranga ni uburyo bumwe  dufite, ni amahirwe  dufite  ariko usanga abiganjemo ari abagabo gusa. Mu byo twagambiriye rero ni ukugira  ngo  umugore nawe  ajye  mu mabuye y'agaciro agire icyo  yinjiza  mu rugo, kuko  iyo  umuntu afite  amafaranga , iyo hari icyo ashoboye  gukemura   uwo ari we wese arubahwa , dushaka  ko abagabo  babona ko  abagore na bo  bashoboye.''

Uyu muhuzabikorwa  w'inama  y'Igihugu y'abagore aravuga ibi  mu gihe  hari  abagore  usanga bakizunguza ibicuruzwa  mu buryo  butemewe, bacunganwa  n'inzego  z'umutekano  bakavuga  ko babiterwa  no kutagira  amikoro ndetse  no kubera igishoro  gito.

umwe  mu bagore  bacuruza  imboga  mu kiganiro yagiranye  na heza.rw , yavuze  ko atashobora  kwirangurira  n'agafuka  k'inyanya  kuko gahenze , agahitamo kurangura duke  afitiye ubushobozi. Ati'' Agafuka k'inyanya  wakaranguza iki, njyewe  mba  mfite  nk'ibihumbi  bitanu gusa  nkarangura duke  nkatuzunguza  nagira  amahirwe abadasso ntibammfate nacyura  nka bibiri nkararira ibyo.''.

Ibi binavugwa  n'undi  mubyeyi  wo  mu kagari ka Gifumba  ukora  umwuga  wo kuboha  imitako itandukanye  mu masaro, uvuga ko yagerageje  gusaba inguzanyo  muri SACCO ariko umugabo we akamwangira gutanga isambu yabo ho ingwate.

Ati'' Njyewe  numvaga nshaka  kujya  mu bucuruzi ,nkajya njya mu isoko nkarangura imboga zitandukanye  nkazicuruza ndimo no kuboha, ariko umugabo yaranyangiye gutwara icyangombwa  cy'ubutaka  ngo  bampe ingwate. Urumva  kubona  amafaranga  k'umugore biba  bigoye  cyane''.

Umuyobozi  w'intara y'Amajyepfo  Kayitesi  Alice  asanga  imihigo  ya ba Mutima w'urugo , ari myiza  kandi ikaba yaragize  impinduka ku mibereho y'abaturage no ku iterambere  ry'umugore.Agira ati'' Dufite imikoranire n'urwego rw'Igihugu rushinzwe ihame  ry'uburinganire GMO, tuzakomeza  kwigisha  buri wese amenye icyo  gukora ariko harimo no kwiteza  imbere''.

Mu mihigo ya ba mutima  w'urugo mu ntara y'Amajyepfo abagore bo mu karere ka Muhanga begukanye  umwanya wa 2 mu turere 8, akaba ari nayo mpamvu bahigiye  ko mu mihigo y'umwaka wa 2022-2023, bagiye gukangurira  abagore  kubyaza umusaruro ubucukuzi  bw'amabuye  y'agaciro,  nk'amwe  mu mahirwe  aboneka mu karere ka Muhanga.

Ba mutima  w'urugo bo mu karere ka Muhanga.

Marie Jeanne UWAMBAYINEMA/heza.rw