Paris: Laurent Bucyibaruta yakatiwe igifungo cy'imyaka 20

Bucyibaruta  Laurent wahoze  ari perefe wa  Gikongoro wari  umaze  amezi  abiri  aburanishirizwa  mu rukiko rwa  rubanda ruri i Paris mu Bufaransa, yakatiwe  n'uru rukiko  igihano cy'igifungo  cy'imyaka  20.

Urubanza  rwe  rwatangiye  ku itariki ya  9 Gicurasi 2022 , yashinjwaga  ibyaha bya jenoside , ubufatanyacyaha muri  jenoside n'ubufatanyacyaha  ku byaha  byibasiye  inyoko muntu.

Muri  ibi byaha  yashinjwaga  ko yagize  uruhare mu bwicanyi bw'Abatutsi  biciwe  mu bice  bitandukanye  by'iyahoze ari perefegitura  yari  abereye  umuyobozi. Aha ni nko ku ishuri  rya Eto  Murambi  ahiciwe  Abatutsi  bagera  ku bihumbi 50, abanyeshuri  90 biciwe  ku ishuri rya Marie Merci i Kibeho, abiciwe  kuri paruwase ya Cyanika  n'iya Kaduha, kuri  gereza  ya Gikongoro  no hirya  no hino kuri za bariyeri  zari  zarashyizweho.

Muri  uru rubanza  abatangabuhamya  batandukanye  bagiye  bagaragariza  urukiko uburyo ntacyo  Bucyibaruta yigeze  akora  ngo  arokore  Abatutsi, nubwo  we  yireguye avuga  ko  icyo  gihe  nta  bubasha yari afite bwo  guhagarika  ubwicanyi bwakorerwaga  Abatutsi.

Ubushinjacyaha  bukaba  bwari  bwaramusabiye  igihano cya  burundu  ari nacyo  kiruta  ibindi  mu mategeko  y'u Bufaransa.

Laurent  Bucyibaruta w'imyaka  78 y'amavuko akaba  yari  yarahungiye  mu Bufaransa  mu mwaka wa 1997. Akatiwe  n'ubutabera  bw'u Bufaransa  nyuma  y'abandi banyarwanda  na bo bahamijwe  ibyaha  bya Jenoside barimo Claude  Muhayimana wahoze ari umushoferi wa Guest house Kibue, wakatiwe imyaka 14, Kapiteni Pascal  Simbikwangwa  wari  mu zahoze  ari  ingabo  z'u Rwanda, wakatiwe  imyaka  25,Tito Barahira na Ngenzi  Octavien  bahoze ari ba burugumesitiri  ba komini Kabarondo.

Uwambayinema  Marie Jeanne/heza.rw