Umugore utekanye ni nawo muryango utekanye, kandi umuryango utekanye ni wo terambere ry’Igihugu: Ingabire Marie Immaculée

Umuyobozi  w’umuryango  urwanya  ruswa  n’akarengane  Transparency  international  Rwanda, Ingabire  Marie  Immaculée  , agaragaza  ko  abantu  bibwira  ko  gusambanya  umugore  no kumukubita  ari  ryo hohoterwa  gusa,ariko  nyamara  ngo  sibyo  kuko  ihohoterwa  rigenda  rikagera  kure, rikababaza  umutima  n’ibitekerezo, aho  umugore  ahozwa ku nkeke akabuzwa  umutekano, kandi  nyamara  umugore  utekanye  ari nawo  muryango  utekanye, umuryango utekanye  ukaba iterambere  ry’Igihugu.

Ingabire  yavuze  ko ikibazo  gikomeye  gihari  giterwa  nuko abantu  badashaka  guhindura  imyumvire ,ngo  bumve  ko aho  iterambere  rigeze  umugore  akwiye  kujyana  na ryo, ahubwo  bakumva  ko  yaguma inyuma.

Ati’’Buriya  hari  ihohoterwa ribi  cyane  dukunze  no kudapfa no kubonera ibimenyetso, ihohoterwa  ribabaza  umutima, iribabaza  imitekerereze , guhoza  undi  ku nkeke utanamukubise ni ihohoterwa  ribi cyane  rikenera ubujyanama’’.

Ubwo  yari  ari  mu kiganiro  n’abafatanyabikorwa  batandukanye  ba  Minisiteri  y’uburinganire  n’itangazamakuru, yatanze  urugero  rw’umukobwa  uherutse  kubaka  inzu abantu  bakamwibasira  ku mbuga nkonyarambaga no  mu bitangazamakuru , ko  amafaranga  yayubakishije  ari  ayo yakuye  mu busambanyi. Marie Immaculée yavuze ko gukomeza kwibasira  uyu mwana  w’umukobwa ari  ukumukorera  ihohoterwa  ribabaza  umutima, kuko  inzu yubatse  iramutse  yubatswe n’umugabo nta cyo  bavuga.

Umunyamabanga uhoraho muri  Minisiteri y’uburinganire  n’iterambere Batamuriza Mireille avuga  ko  mu minsi 16 yo  kurwanya  ihohoterwa, abantu bakwiye  kwitabira  gahunda  zitangwa  na isange one stop  kugira  ngo  bahabwe  serivisi  zihabwa  abahohotewe.

Ati’’ Umuntu  yaremanywe  ubudahangarwa  nta  muntu  n’umwe ukwiye  guhohotera  undi , yaba umugabo  uhohotera  umugore  cyangwa  umugore  uhohotera umugabo’’.

U Rwanda  kimwe  n’ibindi  bihugu  bari  mu minsi  16 y’ubukangurambaga  bwo kurwanya  ihohoterwa  rishingiye ku gitsina. Nubwo  abantu n’abagabo  bahohoterwa  ariko  Minisiteri y’uburinganire  n’iterambere, MIGEPROF igaragaza  ko 90% by’abahohoterwa  ari  abagore  n’abana.

Madamu Ingabire  Marie Immaculée  avuga ko guhohotera umugore  ati ukumukubita cyangwa kumusambanya ku gufu gusa, ko hhari n'ihohoterwa ribabaza umutima

Batamuriza  Mireille Umunyamabanga uhoraho muri Migeprof, avuga ko nta muntu n'umwe ugomba guhohotera undi kuko umuntu yavukanye ubudahangarwa.

Marie Jeanne UWAMBAYINEMA /heza.rw