Kamonyi: Kuvukana ubumuga bukavurwa burakira.

Bamwe  mu babyeyi  bo  mu  karere  ka  Kamonyi  bari  bafite  abana  bafite  ubumuga, bahamya  ko  iyo  umwana  yitaweho hakiri  kare, akabona  ubuvuzi  akira  ndetse  akongera  kugenda  neza , abandi  bakavuga.

Abaganiriye  na heza.rw bavuga  ko  ikigo  cya  CEFAPEK(Centre  de  Formation Agricole et de petit Elevage de Kamonyi) giherereye  mu murenge  wa  Gacurabwenge mu karere  ka Kamonyi , gisanzwe  kita  ku   bana  bafite  ubumuga  cyabavuriye  abana, none  ubu bakaba  basigaye  bagenda  nk’abandi  bana, abandi  baka  baranagiye  mu ishuri.

Karucurira  Trifina  utuye  mu murenge  wa Gacurabwenge , ni  umwe  mu babyeyi   bafite  abana  bavukanye  ubumuga  none ubu akaba  yarakize  agenda  neza. Avuga  ko  akimara  kubona  ko abyaye  umwana  ufite  ubumuga  yihebye  cyane akabona  ko ntacyo  azamarira  ndetse  akumva  afite  ipfunwe  no  mu bandi  babyeyi.

Uyu mubyeyi avuga  ko  yaje  gusurwa  n’umwe  mu bihayimana  bakora  muri  iki kigo  maze  akamushishikariza  kuzana  umwana  we  bakamuvura . Nyuma  y’imyaka  y’imyaka 15 adahaguruka  uyu mwana ubu yasubiye  mu ishuri  arimo kwiga  nk’abandi. Agira ati’’ Nishimira  ko iki kigo cyamfashije kikamugorora yamara  gukira  bakamujyana I Gatagara ubu aragenda  neza  nta  kibazo, ariga  neza nyuma  yo kubona ko uwanjye  akize  nafashe  undi  mwana  mpawe na Leta  nawe  ufite  ubumuga , ndimo kumugoroza bamumpaye  ahora aryamye ateguka, aticara, ubu amaze  kwicara  aregama .Nibura  mu myaka itatu azaba agenda neza duhagararanye ndabyizeye.’’

umwe  mu bana 786 barimo  kugororerwa  muri CEFAPEK waje  adashobora  kwicara  no guhagarara

Nyirandimubanzi  Esperance  nawe  avuga  ko  yari  afite  umwana  uite  ikibazo  mu mutwe  agira imyaka  ibiri  n’amezi  arindwi  ataragenda, nyuma  y’uko  amugejeje muri CEFAPEK baramuvuye  umwana  arakira ndetse  ubu ari mu ishuri  ageze  mu mwaka  wa 3 w’amashuri  y’incuke. Ati’’ Abantu baransekaga ngo nabyaye ikimuga , abandi  babyeyi  ngo uriya mwana angina n’uwanjye none ntavuga  ntagenda, bikambabaza  cyane  ariko nyuma  y’uko avuwe  ubu aragenda  neza  wenda  ntaravuga  neza  ariko aratobora  akavuga, agakurikira mu ishuri aragenda rwose umwana ufite ubumuga iyo ahawe ubuvuzi arakira akamera nk’abandi’’.

Sr Donatille  Mukarubayiza  umuyobozi  wa CEFAPEK avuga  ko  muri  rusange  umubyeyi  wabyaye umwana  ufite ubumuga  ngo  amera  nk’uhahamutse , kubyakira  bikagorana. Ariko  ngo icyo bakora  iyo  bamenye  ahari umwana  ufite  ubumuga  basura  ababayeyi bakabahumuriza  ubundi  bakabasaba  kubazana  bakabaha  ubufasha  bw’ubuvuzi. Kuri  ubu  ngo  hari  abana  bamaze  gukira  neza  babikesha  ubugororangingo  babakoreye.

Agira ati’’ umwana ufite ubumuga  iyo  umutangiye  kare  uba  uzi  ko hari aho uzamugeza, ni ukuvuga  kuva ku myaka  0 kugeza ku myaka itanu , iyo aje  ayirengeje  urumva  ntacyo  wamukorera  icyakora  nk’abafite  ibibazo  byo  mu mutwe  birumvikana  aho aziye  niho umufatira’.’

Soeur Donatile Mukarubayiza umuyobozi  wa CEFAPEK kita  ku bana bafite ubumuga 

Uyu  mubikira  avuga  ko kuri  ubu  bafite abana  786  barimo  kuhagororerwa  muri  bo  353 ni abakobwa  naho  453 ni  abahungu.Abakize  neza  bashoboye  kugenda  bavuriwe  muri iki kigo  ni 127.

Nyuma  yo  kubona  ko abana bakeneye  ubugororangingo  ari benshi  muri  aka karere  kuri  ubu bagiye  bashing amatsinda  hirya  no hino  abana  bakagororerwa  hafi  y’iwabo  kuko wasangaga  bivuna  ababyeyi  kubazana  ku Kamonyi  aho  iki kigo  babahetse  dore ko  nta  bundi  buryo  bafite  bwo  kubatwaramo. Kuri  ubu muri  aka karere  bamaze  kuhagira  amatsinda 19.

Marie   Jeanne  UWAMBAYINEMA /heza.rw